Ch'ellu si n'hè scorsu maghju
Sarà più d'una simana
Approntati, o capraghju !
A' lasicià piaghja è calmana
Ch'ai da fà l'altu viaghju
Dopu ghjuntu in Barghjana
Avvedeci, o Falasorna !
Cù i parenti è l'amichi
Sempre liati à Niolu
Per e gioie è i castichi :
Da Montestremu à u mare
Avemu listessi antechi.
Sbuccarè in Caprunale
Guardendu da altu à bassu
Supranendune à O'mita
E'a funtana di u Tassu
Basgiati a croce nova
Chi a vechja ùn s'hè piu trova.
Eccu a Mirindatoghja,
Ti riposa di à a capra
Ch'ella ùn si sia sbandata
Se tù voli esse in Pùscaghja
Tranquillu pè a nutata.
Dumane, à tempu ghjornu,
( A cunosci quessa, a scola)
Crisciaranu e fatiche
Nanzu d'esse in Bagnarola.
Di scopre a valle di Tuda
Tutt'ogn'unu si cunsola.
Dopu so i radi à Noce;
Bassighjendu à e Pratelle
T'avviarè più sicuru
Verdi l'acqua di e castelle
Nanzu d'esse à u Muricciolu
Sarà croscia a to pelle
Eccuti nu a Spilonca,
Custi a banda si punta
Indu a mandria è aspetta
Chi hà bisognu d'esse munta.
A datti un colpu di manu
A to ghjente sarà ghjunta.
U terzu ghjornu à la mane
Ti n'andarè vulinteri
In Sesta o Petra Pinzunta,
Bicarellu o à Tileri;
Più che mai ghjunghjaranu
A'l'abbordu i fristeri
Avà chi ai righjuntu
Di l'istate u rughjone
Di tantu in tantu in paese
Affaccati à l'occasione
Poi ùn mancà a to festa
A mane di Sant'Antone.
Parole: Macellu ACQUAVIVA di l'acquale
Musique : Ghjuvan-Claudiu ACQUAVIVA
